Budyšyn/Bautzen. Na pósejźenju Zwězkowego pśedsedarstwa Domowiny 25. februara w Budyšynje su se teke z našeju aktualneju mizeru dla planow MBJS zaběrali. Kubłańske ministarstwo w Bramborskej (MBJS) ga co nowe póstajenje wobzamknuś, z kótarymž by zagaśili serbsku wucbu w zakładnych šulach. Zwězkowe pśedsedarstwo ma k tomu jasne wótegrono: wótpokazuju take póstupowanje a pominaju garantiju za serbsku wucbu na kuždej šuli, źož starjejše to pominaju. „Z nowym póstajenim njamógu šule serbsku wucbu w samskej kwaliśe ako doněnta póbitowaś“, stoj we stojnišću, kótarež su jadnogłosnje wobzamknuli. „Na tom sensibelnem pólu njesměju žedne skrotcenja byś, ale nawopak dej se wšykno cyniś, aby wšykne zajmce móžnosć měli, bźeze zadorow serbsku rěc wuknuś. Zwězkowe pśedsedarstwo napomina wšykne kupki, towaristwa a cłonki Domowiny, aby se takemu protestoju pśizamknuli. Pokazali su na lišćiny z pódpismami a online-peticiju (glědajśo na wjeliki artikel na tom boce).