Ze Tšadowa/Stradow. Rowno pśed 7 lětami jo se w Tšadowje pla Wětošowa něco wažnego stało. Pó tom, až běšo tam w pěśźasetych lětach, w casu DDR, bóžko wusnuł ten zapust ze swójim tradicionalnym pśeśěgom, su ten nałog w lěśe 2010 zasej wótžywili. Za to jo se wósebnje póstarało tamne Domowniske towaristwo, a teke wognjowa wobora ze jsy jo k tomu pśipomagała. Ten nowy zachopjeńk pśed 7 lětami pak njejo był lažki. Zyma ga jo była wjelgin kšuta – pśi něźi 20 gradow minus su tegdy zapustowe póry śěgnuli pó jsy. Na to jo se Ludwig Psaar wót togo towaristwa domyslił.

Až jo zapust mjaztym w Tšadowje zasej wjelgin woblubowany, jo se pokazało sobotu, 11. februara. 36 pórow jo se wobźěliło na pśeśěgu, fryjne a ženjone gromaźe. Dwě žeńskej běštej se stajiłej k tomu lapu.

Samo w telewiziji rbb su to ned wjacor pokazali w „Brandenburg-aktuell“. Znata reportarka Joanna Jambor, ako to wjedro pśipowěźejo, jo tam póbyła a z mikrofonom a kameru su zapópadnuli, kak tam w tej błośańskej jsy zapust swěśe. Žedne wobźělniki su jej wulicowali, kak raźi tam zapustuju.