Prjawoz/Fehrow. 20. januar 2017 jo šołta gmejny Smorgorjow–Prjawoz Joachim Emmrich na 8. woklapnicu w Prjawozu pśepšosył. Jadnab 50 wobydlarjow jo pětk wjacor do sportarskego domu pśišło. Woklapnica dajo móžnosć, spódobnje gromadu sejźeś a zgóniś, co gmejna jo łoni napórała a co jo planowane.

Na zachopjeńku zarědowanja jo statistika se pśedstajiła. Licba wobydlari w Prjawozu jo łoni spadnuła wót 333 na 324 (–9), rownož jadno góle jo se naroźiło a teke luźe su pśiśěgnuli.

Pó licbach jo rozpšawa šołty slědowała. Gmejna jo nowe grunty za wognjowu woboru kupiła, aby jej wěcej ruma k dispoziciji stojało. Pśetwarjenje jo juž planowane, aby skóro do nowego domicila zaśěgnuli. Šef Maik Eckert a te jadnab 30 cłonki wognjoweje wobory wjasele se na to. Mimo togo jo koncepcija za wugótowanje kjarchoba nastała.

Co jo hyšći cyniś? Droga do źiśownje dej se pólěpšyś. Źiśi na busowem zastanišću deje byś lěpjej pśed wjedrom šćitane. Dalšny zaměr jo stawne pśizamknjenje k seśi kólasowych drogow.