Turjej/Tauer. Tudejšna Domowinska kupka jo měła pětk pśed dwěma tyźenjoma w kjarcmje Pśi dole (Am Dorfteich) głownu zgromaźinu. Jeje pśedsedaŕ Harald Końcak jo zespominał stare lěto. Lisćina tšojenjow, źož cłonki su byli pódla, jo dłujka: program Serbskego ludowego ansambla k zapustoju w Hochozy, spiwarski wjacor z Pśezpólnymi (teke tam), župna głowna zgromaźina w Źiwizach a kus Nimsko-serbskego źiwadła Do źěła, no chop w Janšojcach. Wóni pak su teke sami zmakanja organizěrowali. Su pśepšosyli Domowinske kupki něgajšneje župy Gubin/Baršć, źož su spominali na jeje 1. sekretarja Maksa Hanšku. Teke folklorna kupka Łokaśina z Lubnjowa jo k nim na woglědy pśijěła.
Na kubłańsku ekskursiju su se wudali do Pódstupima, do filmowego parka w Balbelsbergu. Teke z łoźu su se pó Haboli pśejězdźili. We bližy hotela su někotare wiźeli wjacor biśe a kałanje z nožami, a policajski helikopter, ak jo se za tymi kałarjami wudał. A to njejo było grane!
Wjeliki wjerašk jo było wobźělenje kupki na serbskem festiwalu w Janšojcach, źož su we pseśěgu prezentěrowali žywjenje Fryca Rochy.