„Wósebny koncert na zachopjeńku lěta – zachopk 17“ jo lětosa 18. januara ceło stojał w mysli pśeśiwnosćow. Pśi tom su Heidemarie Wiesnerec a Anton Sasko na klawěrje a Waltraut Elvers z bratšu wucynili Serbski Dom w Chóśebuzu zgromadnje z moderatorom Detlevom Seydelom dwě góźinje dłujko k pśisamem historiskemu městoju: Nigdy do togo w rěźe koncertow njejsu pśedstajili tak wjele nowych kompozicijow serbskich komponistow. Wugótowała jo ten program w Chóśebuzu Heidemarie Wiesnerec, a to južo k 12. razoju.
Wót pśiglědarjow pomina ten wjacor dwě wušy, tradicionalne a awantgardistiske, jo gronił Detlev Seydel na zachopjeńku. Serbske komponisty Jan Cyž, Detlef Kobjela, Ulrich Pogoda, Hinc Roy a Sebastian Elikowski-Winkler su zwónoźeli, až wjele pśeśiwnosćow we jich nowych muzikaliskich twórbach jo. Tak su se wótměnili w programje melancholiske wariacije z klawěrom z głosnymi disonancami, śěsnjecymi zukami bratše a wósebnymi wašnjami instrumenty graś. We wótměnje ze serbskimi nacasnymi wuźěłami su zaznělili twórby Bacha, Chopina, van Beethovena, Prokofjewa a Bartholdy.