W slědnem wudaśu „Nowego Casnika“ smy pśedstajili seś „Lausitzrunde“ w interviewje. Smy teke kśěli wěźeś, kaku demokratisku legitimaciju wóna ma – wšak mamy na pśikład wokrejsne rady abo Zwězk městow a gmejnow. Kak wiźe legitměrowane zastupniki tu rundu? To smy kśěli wěźeś wót Moniki Schulz-Höpfneroweje (CDU), pśedsedarki wokrejsneje rady Sprjewja-Nysa. Interview jo wjadła Stefanie Krawcojc.

Kněni Schulz-Höpfnerowa, we „Łužyskej runźe“ su se šołty a krajne raźce zwězali, aby zastupowali swóje zajmy. Kak wy to pósuźujośo?

To mam principjelnje za pšawje. Což mě móli: až wóna runda zastupujo łužyske zajmy pśeliš jadnobocnje. Wóna jo za wudobywanje brunice. To jo grodkojska šołtowka ceło jasnje groniła. Na taki part wóni njezastupuju wšykne gmejny abo wobydlarje. Gaž někaki gremium ale co powědaś za łužyske komuny, ga muse teke te pódla byś, kótarež se hynac mysle. We tom paźe mjenim na pśikład Derbno (Schenkendöbern) abo Gubin.

Kak by mógali gmejny se zwězaś a swóje zajmy zgromadnje zastupowaś?