Budyšyn/Bautzen. Nimsko-serbske ludowe źiwadło w Budyšynje tak ako chóśebuske statne źiwadło a Nowe jawišćo we Złem Komorowje su wupisali w lěśu 2016 nowe źiwadłowe myto.

Zaměr togo wupisanja „Lausitzen 2017“ jo, až awtory naceriju źiwadłowy kus, kótaryž wopśimjejo łužyske temy. Mjazy drugimi serbske. W slědnem decemberje jo se dwójc jury zmakała, źož stej byłej teke Jurij Koch a intendant budyšyńskego źiwadła Lutz Hillmann pśipódla.

Rozsuźili su se za kus „Łužyske kwartěry abo Rus w piwnicy“. Awtor Ralph Oehme z Lipska jo dostał stakim to głowne myto a buźo něnto ten kus donapisaś. Nejpjerwjej ga su dejali te anonymne awtory – jich jo było dogromadu 21 – nacerjenje kusa a jadnu donapisanu scenu wótedaś.

W grajnej dobje 2017/2018 buźo budyšyńske źiwadło ten gótowy kus na jawišćo spóraś. Głowny tema jo tam serbska familija we wšakich casach 20. stolěśa. Pśedstajenja budu teke w Chóśebuzu a Złem Komorowje.