Lěcrownož kazni jogo pśed pśegónjowanim woplěwaju, ga weto pólecaju gumnyškarje njepśestawajucy na njogo. To grono jo how wót kšeta abo škreta, źiwnego zwěrjetka, kótarež wjeźo swójo kšajźne žywjenje we nimjernej śamnosći, pód zemju. Źož słyńcko žednje njeswěśi, tam stej wócy knicomny luksus, a togodla jo kšet pśisamem slěpy. Za to pak ma wjelgin dobrej wušy a dobry nos, což jo wužytne we tych śmojtych pódzemskich tunelach a komorkach. Kšet ma naglědny carny kóžušk a rědne włoski pśi nosu, a wuglěda lubosnje, we wěrnosći pak jo to wjelgin rubjažne a stawnje głodne zwěrje. Wón se žywi wót cerwjow, wužeńcow, guseńcow, brukow, wakow a slinikow (škódnym insektam groni se na serbski gad). Zapšawym mógali jogo za wužytnego zwěstkarja měś: wón tamjo na lěto až do 37 kg škódnego gadu, a pśez jogo ryśe pśiźo luft do zemje – same dobroty, kótarež kšet cyni nam ceło zadermo. Kórjenjow, łopjenow a wšogo drugego, což kuli w gumnje rosćo, njedotyknjo se wón zewšym.