Hochoza/Drachhausen. Starjejšyska iniciatiwa (starjejše sedymich źiśi, ako chójźe do hochoskeje źiśownje) jo tudy kóńc nowembera organizěrowała chytšy gódowny mark. Wjele hochoskich wobydlari jo gótowało sobu. Lieberwirthojc su pśedawali keramiku ze swójeje źěłarnje. Heindorf jo pśedawał grajki z drjewa, ak jo sam zgótował. Starjejšyska iniciatiwa jo měła teke swóju budku: tam źiśi su mógli basliś, starjejše su pśedawali pyšnjenje za gódowny bom, wóleje, marmeladu a likěry (wšo su sami zgótowali). Hochoska młoźina jo pjakła francojske mlince (crepes), sportarske towaristwo jo pśedawało piśa. Struskarnja Blumenkörbchen z Bórkow jo była zastupjona. Na źiśi jo cakał rědny, z pisanymi lampami wobswěśony karasel. Wjeliku napnětosć pla źiśi jo wubuźił bog. Hynac ako w zachadnych lětach, jo wón pśišeł gromaźe z janźelami, jo sejźeł na stole we ekstra natwarjonem stanje (Zelt), jo wołał kužde góle ku se a rozdawował jim dary. Sajźiło jo tombolu, we kótarejž sy mógał žywu gus dobyś. Ku kóńcu su wognjowe rejowarje Ravenchild z Kótłowa pokazowali wognjecu show.