Wu Krawcojc w Janšojcach jo drugi adwent była ta slědna gódownica za rentnarje we tej kjarcmje. Wšykno jo było rědnje wupyšnjone a dobry „chryzbrot“ (kołac) jo był wupjacony. Ale zawěsće njejsu jano jědli na tej njeźeli. Wejsna pśirada jo staršym wobydlarjam pśigótowała spódobny program. Jadnab 60 źiśi zakładneje šule „Krabat“ jo jen wugótowało w nimskej, serbskej a engelskej rěcy. Rochojc Gina a Schmidtojc Tino z Mósta stej wuwitałej gósći na serbski a na nimski. Źiśi su z radosću spiwali moderne adwentowe a gódowne spiwy. Styri źiśi su pśednjasli serbsku baseń „Sněg“. Na kóńcu su pokazali „Reje swětła“.