Chóśebuz/Cottbus. Spěchowańske towaristwo za Serbski muzej jo wótźaržało pětk tyźeń we wjažy Měsćańskego muzeja głownu lětnu zgromaźinu. Na nju jo woglědał wósebny gósć, kótaregož pśiźenje jo cłonki pśechwatało: Janšojski bog ze zakšytym woblicom, ze pšutom w ruce a z jadneju pśewóźowarku. Wón jo kuždego z pšutom pózlažka šmarnuł a jomu šokoladowu pralinu pódarił.

Co take tšojenje na zgromaźinje towaristwa ma na se? Rozmjej: Towaristwo jo lětosa gromaźe z Rěcnym centrumom Witaj dało wušyś nowu kompletnu drastwu Janšojskego boga. (Z tym projektom su zachopili južo lěto pjerwjej, łoni su dali ten hupac zgótowaś). Stakim jo projekt něnto dokóńcowany. Tu drastwu jo wušyła šlodarka Johanna Zapjacarina z Rubyna. 70% pjenjez jo pśipłaśiła Załožba za serbski lud. Towaristwo jo swóju źělbu pjenjez dostało wót swójich cłonkow, ale teke žarjabnica wokrejsa Sprjewja-Nysa jo jim 300 € pśiłožyła. Jeje zastupnika stej teke na zgromaźinu pśišłej a se dałej wót Janšojskego boga žognowaś.