Filmarje zbliska a zdaloka zajmuju se za serbsku kulturu. Ale až młoda filmarka wjerśi film ze swójeje jsy a co ten samy film na festiwalach pokazaś, to jo kradu rědko. Stało jo se to w Rownem, źož ma Frauke Rahr swój starjejšyny dom. Ta 29lětna wuměłcowka z wótzamknjenim na wušej šuli za wuměłstwo Burg Giebichenstein bydli w Halle, jo ale cesćej pla swójeju starjejšeju w Rownem. Na dwórje bydli teke ta stara mama Renate Zechowa. A ned napśeśiwo ma Emma Kralowa swój dom. Tam jo Frauke w slědnych lětach cesćej chójźiła. W lěśu 2015 jo někotare tyźenje dłujko doma bydliła a jo kužde zajtšo na drugi bok drogi šła. Tam jo kněni Kralowu pśewóźowała ceły źeń. A wótergi jo kameru zašaltowała, gaž jo něco było, což jo ju wósebnje zajmowało. Teke lětosa jo tam cesto na woglěźe była, jo ta 85lětna kněni Kralowa Casnikoju wulicowała. Pón jo wóna sebje ten cas wzeła za te narske pšašanja Frauki.