Zakrjow (Wadelsdorf) jo akle pózdźe prědny raz wobspomnjety: w lěśe 1545. To serbske mě se lažko rozmějo – wjas za krjami. Z raneje historije njejo wjele znatego. Ta prědna powěsć wulicujo, až tudejšy kněžk Nitschke jo załožył tudy kjarchob. Zakrjow a Lěšće (Hornow) stej we jadnej wósaźe, a kjarchob jo pjerwjej był jano w Lěšćach. Ten kněžk jo za to załoženje kjarchoba swóje pjenjeze dał, how lažy wón zakopany až do źinsajšnego dnja.