Serbsku kjarmušu swěśiś – to jo južo młoge lěto za sobu wjelgin dobra tradicija w Domowinskej kupce w měsće. A rowno tak ako woblubowany wulět gótujo to měsćańska kupka gromaźe ze cłonkami Domowinskeje kupki w Žylowje.
Ako zmakanišćo za tu serbsku kjarmušu su se w slědnych lětach wupytali gósćeńc „Nordstern“ w Žylowje. Tam se wšyknym wjelgin spódoba a obligatoriska gusyna pjaceń tam derje słoźi.
To se wě, až słuša k tej zgromadnej kjarmušy teke serbska kultura. Tenraz su se pśepšosyli kupku, kótarež pla cłonkow w měsće a Žylowje hyšći tak znata njejo, w drugich stronach Łužyce pak šym wěcej. Jo to muzikowa kupka abo kapała z rědnym mjenim „Kula Bula“. To su tśi serbske gerce – Frank Kosyk z Kopańc/Neuhausen, jogo syn a student Jan a Joachim Jurenc z Pančic/Panschwitz w Górnej Łužycy. Te tśo su zagrali w Žylowje a spiwał jo k tomu Gerald Schön.