My Serby płaśimy ako kradu góspodliwe a teke sami se raźi tak zaźaržujomy. Gaž na pśikład pśidu „wusoke gósći“ k Serbam, pón je witamy w swěźeńskej drastwje a ze solu a klěbom. Ale kak jo kuždy źeń a zasadnje?

Ze swójim nimskorěcnym pśednoskom „...und die Gastfreiheit war eine ihrer hervorragendsten Eigenschaften“ jo kśěł Hajko Kozel pśidatnje aktualne politiske akcenty rozswětliś. Wón ga jo za Lěwicu cłonk krajnego sejma w Sakskej a samostatny pšawiznik. A we tom jo na to starcył, až w Nimskej pšawa wuběgarjow fachnikam znate njejsu a se pśisamem nichten wó nje njestara. Dalejkubłanja se teke njepóbituju. Tak jo chopił pśednosk w rěcnej šuli 7. nowembra. Tym pśisamem 15 pśisłucharjam jo dał doglěd do historiskich wopisowanjow Serbow. Góspodliwosć ga jo kradu wjele pla našych prědownikow płaśeła.