Swój 90. narodny źeń a 70lětny jubilej swójogo źěła pśi rozšyrjanju wěźenja wót Serbow jo swěśił dr. Zbigniew Gajewski, źiśecy gójc, pisaŕ, basnikaŕ, pśełožowaŕ a teke załožaŕ a cesny pśedsedaŕ Pólsko-serbskego towaristwa. Ten swěźeń jo se stał w Žarowje, głownem měsće pólskego źěla Łužyce.
Južo šesć lět zmakuju se wobydlarje Žarowa nazymu na Dny serbskeje kultury. Lětosa su je swěśili na 6. a 7. oktoberu, a to tšojenje jo gromaźe padnuło z premjeru knigłow „Paradiz“ górnoserbskego awtora Křesćana Krawca. Dny serbskeje kultury su byli teke góźba, aby wutšobnje gratulěrowali 90lětnemu jubilaru dr. Zbigniewoju Gajewskemu, cesnemu pśedsedarjeju Pólsko-serbskego towaristwa, kótaryž jo wóne knigły do pólskeje rěcy pśestajił.