Wót lěta 2002 do 2006 jo se Rogow/Horno pśesedlił. A to nic dobrowólnje, ako kuždy wě. W pśedpólu pśesedlenjow su Rogowarje a Domowina wót Vattenfalla pominali, až dej nastaś jaden informaciski centrum, kótaryž pokažo na wšykne wótbagrowane jsy w Łužycy dla brunice. A toś ten Archiw zgubjonych jsow tak ako Cerkwinski centrum stej se wótwóriłej pśed 10 lětami, 14. oktobra 2006. Ten jubilej su wužywali ako góźbu dopomnjeś na ten kradu śěžki cas. Zmakali su se 3. nowembra w rogojskem gósćeńcu.

„Něnto móžomy južo lěpjej slědk glědaś, rany njejsu wěcej tak tšašne“. Tak jo Casnikoju wulicował pjerwjejšny šołta a něntejšny wejsny zastojaŕ Rogowa Bernd Siegert. Jo teke pśišła na to dopomnjeńske zarědowanje radna kopica Rogowarjow.