Superkokot 24. septembra w Běłej Górje jo był wjelicne zarědowanje z wjele spokojnymi pśiglědarjami. A tamna młoźina jo wjelgin gjarda, až jo to był južo ten tśeśi superkokot w Běłej Górje. Někak su južo hejnak profije, což nastupa pśigótowanje togo swěźenja. Weto su Casnikoju wulicowali, až by se južo wjaselili, gaž pśiducy superkokot buźo w jadnej drugej jsy. Tych pśigótowanjow ga jo wjele. Ale ako južo wěmy, jo Rico Noack zasej superkral a stakim buźo superkokot 2017 zasej w Běłej Górje.
Nowy Casnik jo pódla był pśi pśigótowanjach. Stwórtk a pětk wjacor su wili šesć wěnkow a wrota. Za nje trjebaju dogromady styri grědy. Aby njemusali to sami wšykno naźěłaś, jo było tak wucynjone, až Běłogórjanarjam druge pomogaju. Z tych jsow, kótarež maju teke rejtarja na superkokośe. Jich jo dogromady 19. Pśišli su młodostne z Bórkow, Brjazyny, Dešna, Janšojc, Kózlego, Kósojc (Koßwig), Prjawoza a Žylowa.