Lětosa w juniju som sebje wzeła dowol, aby se wobźěliła na 3. Europeaźe, kenž jo se wótměła w Ahrntalu/Valle Aurina w Pódpołdnjowem Tirolu/Südtirol/Alto Adige – Sudtirolo (Italska). Za balokopanje powšyknje som drje měnjej rozpalona, mě stej pak zajmowałej tamna krajina – Ahrntal na pś. jo wobdany wót 80 tśitysacnikow – a połoženje tam bydleceje ludoweje kupki. Mimo togo som kśěła dožywiś pśi drogowanju serbsku atmosferu a mójeje sotšy źowka Sofija jo grała w serbskem žeńskecem mustwje.
Sobotu, dnja 19. junija smy w nocy wótjěli na tyźeń ze Šmidtojc busowym pśedewześim z Radworja/Radibor pla Budyšyna mimo Mnichowa, pśez Brenner, aby był naš „fanowy bus“ dypkownje k prědnemu graśeju serbskich žeńskich, njeźelu zeger 11.00, na městnje w Mühlwalź/Selva dei Molini.