Chóśebuz/Cottbus. Chtož pśiźo na chóśebuske głowne dwórnišćo, ten buźo how wiźeś we pśiducem casu pśisamem kuždy źeń něco nowego. How ga se na dwórnišću samem a wokoło njogo wjele twari a źěła. Až do lěta 2019 abo samo do lěta 2020 dejtej dostaś dwórnišćo a jogo bliska wokolina kradu nowy, hynakše moderne woblico. Stakim buźo how we pśiducych styrich, pěśich lětach nejwětše twarnišćo w měsće. Wudaś budu za to wokoło 50 mio. euro a z teje bejneje sumy płaśi město samo wokoło 8 mio. euro. Ten drugi źěl pjenjez zapłaśiju Nimska zeleznica (DB) a druge.

K prědnemu buźo to wjelike městno mjazy Dwórnišćowym móstom, Dwórnišćoweju drogu a dwórnišćom, źož su dotychměst awta, buse a takse parkowali abo na gósći cakali, docełego pśetwarjone a nowo wugótowane. Jo planowane, až buźo how pózdźej mimo něntejšnego dwórnišća za śěgi, kenž how wustanu, nowe centralne dwórnišćo za wše buse, ako jo něnto pśi Marijinej droze. Teke wšykne linije elektriskeje (Straßenbahn) a měsćańskich busow změju pón how swóju staciju. Wšykno buźo how gromaźe: zeleznica, buse a elektriska. Wšykne pśijědu a wótjědu how.