Ze Tšupca/Straupitz. Chtož co wiźeś wjelgin stare, wjelike a tłuste bomy, ten musy dojěś do Tšupca we wokrejsu Dubja-Błota (LDS). Něźi jaden kilomejtaŕ pśed teju wjelikeju nimsko-serbskeju gmejnu dejśo zastaś, tam, źož wótbocyjo droga do Bělina (Byhlen). Tam móžośo parkowaś, a how se teke zachopijo puś k tym wósebnym dubam. Ned pśi šoseji do Běłeje Góry stoje žedne wjelgin stare bomiska, a zbytki wót nich how teke laže. A tudy se teke zachopijo puś za drogowanje pó „Bytnej“, ako jo jadnab tśi kilomejtarje dłujki. Na njom su wiźeś na dalšnych 11 městnach te rědke tłuste duby abo te zbytki wót nich. Za wětšy źěl su wóni južo „wumrěli“, jano styri su hyšći žywe, jich gałuze su hyšći zelene. Se groni, až su wóni 400 a wěcej lět stare a jadnab 20 mejtari wusoke.