Z Poršic/Purschwitz. Sobotu, 31. oktobra, jo se wótměła lětosna głowna zgromaźina Serbskego ewangelskego towaristwa (SET) w Poršicach na pódzajtšu Budyšyna. Něźi 40 cłonkow a gósći jo na nju pśichwatało. Zachopiła jo se zeger dweju z nabóžninu w tamnjejšej cerkwi, kótaruž jo swěśił serbski superintendent Christoph Rummel. Pó kafejpiśu w farskej brožni jo Mato Krygaŕ, pśedsedaŕ towaristwa, pśednjasł rozpšawu: 51 cłonkow towaristwo ma a dalšny młody luź co do njogo zastupiś. Pśedsedaŕstwo jo w slědnem lěśe wobradowało tśi raze. Zrownju jo Krygaŕ pśedstajił wjeraški towaristwowego žywjenja ako familijowu adwentnicku, familijowy kóńc tyźenja w Hainewalde pó jatšach z 42 wobźělnikami/-cami, Serbski ewangelski cerkwiny źeń we Wórjejcach a Spalem/Spohla a ekumeniski dwórowy swěźeń w Hrubjelčicach/Grubschütz. Wótměło jo se tež 11 zmakanjow Serbskich bjesadow. Toś te „serbske blida“ zmócniju serbske ako teke cerkwine žywjenje na jsach.