Z Města/Cottbus. Ga sćo měli Waš slědny kurs prědneje pomocy? Móžośo kšej wiźeś? Sćo Wy sebje juž něco złamali? Sćo musali raz nuzowy numer wołaś? To su byli zawjeźeńske pšašanja moderatora Serbskego blida Gregor Kliem, na kótarež su dejali gósći – zwětšego wuknice a wukniki Dolnoserbskego gymnaziuma – srjodu wjacor w Serbskem muzeju wótegroniś. To jo było dla głowneje temy wjacora: „Prědna pomoc na serbski“.
Pśepšosyli su ku tej góźbje wuknicu Dolnoserbskego gymnaziuma Emiliju Filenbergojc, kótaraž we swójom lichem casu se angažěrujo, a to mjaztym wušej 5 lět, pśi ewangelskej pomocnej organizaciji „Die Johanniter“. Tam jo wóna wjednica młoźinskeje kupki (Jugendgruppenleiterin) za młodostnych mjazy 12 a 18 lětami a pšawidłownje organizěrujo a pśigótujo trening za prědnu pomoc abo druge aktiwity kaž grilowanje abo graśa. Jeje team jo se samo na krajnem wuběźowanju Johanitarjow lětosa prědne městno wudobył a jo se kwalificěrował za zwězkowe wuběźowanje w prědnej pomocy 2027.