Pśichod lažy we Łužycy! To jo se pokazało 27. oktobra 2026 w chóśebuskej Nimskej cerkwi swětego Nikolaja na wótwórjeńskem zarědowanju k „Łužyskemu cerkwinemu dnju 2028“, kenž buźo w Chóśebuzu, a pśi rownocasnem pśedstajenju projekta „Cerkwine rumy wuwijaś“. Nosaŕ wobeju projektowu jo Centrum za dialog a změnu z wjednicu faraŕku Dorothee Land. Wobej pśedewześi se wjelikomyslnje financěrujotej ze srědkow strukturneje změny ze Zwězkowego programa STARK. Wótpowědujucy wuznamoju wobeju projektowu za region stej reprezentěrowałej EKBO biskup dr. Christian Stäblein a generalna superintendentka Theresa Rinecker. Pśibytnej stej teke byłej cłonk Sakskeje cerkwje a pólski zastupnik cerkwje šlazyńskeje Górneje Łužyce. Wósebny gósć jo była ministaŕka a wjednica statneje kanclaje kraja Bramborska Kathrin Schneider. Komunalnu politiku w Chóśebuzu jo zastupował w prědnem rěźe wušy šołta Tobias Schick, ale teke cłonki regionalnego góspodaŕskego a kulturnego žywjenja, dalej fararje, cerkwine pśistajone ako teke zajmce z ciwilneje towarišnosći.