Cytaŕki a cytarje Płomjenja mógu w casopisu zwucowaś, gódaś a co hyšći?

Na kuždy pad mógu cytaś zajmne artikele a teke basni a wulicowanje. Tenraz namakaju źiśi w Płomjenju samo styri QR-cody, pśez kótarež jo móžno sebje teksty teke wótsłuchaś. Wušej togo mógu wuknice a wukniki wustśigaś memory k temje drastwa. Teke wokablowe kórtki zasej mamy, tema jo Rěcny centrum WITAJ. Myslim se, až w jubilejnem lěśe to derje pasujo. Rěcny centrum WITAJ wobstoj ga mjaztym južo 25 lět.

 Wó kótarych serbskich zarědowanjach źiśi a młodostne tenraz cytaju?

Mjazy drugim wó lětosnej Šuli w zelenem. Wóna jo se wótměła w bórkojskej młodowni w septembrje a na njej jo se 84 serbšćinaŕkow a serbšćinarjow pětego lětnika wobźěliło. Někotare źiśi spóznaju na fotach sebje abo swójich sobuwuknikow. A dobra mysl jo se kněžyła teke na Serbskem familijowem dnju w Mozaikowej zakładnej šuli w Picnju. Tam jo wustupił Serbski ludowy ansambel z Budyšyna, kenž jo pśedstajił perkusijne instrumenty z cełego swěta. Šulu w zelenem a Serbski familijowy źeń jo organizěrował Rěcny centrum WITAJ.