Lěc jo „Byttna“ pla Tšupca napšawdu „město bitwy“ w srjejźnem wěku, by źe se dało zwěsćiś pśez archeologiske pśespytowanja a wótpowědne namakanki a druge zawóstajone slědy w zemi. Jo młogi raz śěžko, z takego starego słowa z jano dwěma złožkoma wucytaś abo wugódaś pšawy prědnotny zmysł. Až jo markgroba Gero (* wokoło 900, † 965) ze swójimi wójnarjami w Dolnej Łužycy póbył, móžomy pak za wěrne měś. Sakski chronist Widukind von Corvey (* 925 abo 933/935, † pó 973) jo pisał wó wójnskej wu-pšawje markgroby Gera w lěśe 939 do Dolneje Łužyce. Tegdy su Łužycanarje napśecej zgubili swóju politisku njewótwisnosć. Ale Widukind jo wó tšojenju zawóstajił jano jadnučku sadu we łatyńskej rěcy, kótaraž w serbskem pśełožku wugronijo: „Tegdy jo markgroba Gero z wjelikeju mócu pśemógł Łužycanarjow pomjenjonych Słowjanow a jo jich do dopołnego knechtojstwa nuźił, ale nic bźez swójskego śěžkego zranjenja a tšuśa swójogo sotśinego syna, wusegujucego muža a wjele drugich zemjanow.“