Z Budyšyna/Bautzen. Mjasecne literarne dopołdnjo, kótarež Nimsko-Serbske ludowe źiwadło (NSLŹ) južo wjele lět póbitujo, jo se njeźelu na cesć Jurja Brězana, Jurja Kocha a Bena Budarja wótměło. W Źiwadle na groźe su pśednjasli wurězki z jich twórjenjow.

Jadnu njeźelu wob mjasec zmakaju se lubowarje literatury k zgromadnemu snědanju a pó tom na góźinku cytanja ze wšakich twóŕbow. Póbitowanje slědnu njeźelu jo było wósebny wjerašk: W srjejźišću su stojali serbske spisowaśele Beno Budar, Jurij Koch a Jurij Brězan, dokulaž by měli abo su měli lětosa wósebny jubilej. Beno Budar by lětosa swóje 80. narodniny swěśił. Pśi góźbje jubileja jo Anna-Maria Brankačkec někotare basni z repertoire Bena Budarja recitěrowała. Mimo togo jo pśedstajiła něźi 60 zajmcam wurězk z jogo knigłow „Cowboy Tom abo dyrdomdej ze zaka“. Zagronita za literarne dopołdnjo, něgajšna dramaturgowka Eveline Günther, jo se rozsuźiła, basnicki a twórjenja z póśěgom k Budyšynoju wupytaś, źož jo Budar bydlił, nježli až jo do Hornjeho Hajnka (Dreihäuser) pśeśěgnuł.