Platforma „sobu“ póbitujo mjazy drugim mini-projekty z wjele awdio-materialom, pśedcytańka, rymy, recepty, graśa a spiwy. A maju hyšći dalšne materialije, ako hyšći wobźěłaju a na tom boku wózjawiś kśě. 
Z Města/Cottbus. Dotychměst su byli informacije, nazgónjenja a materialije k wšakim temam w dolnoserbskej rěcy na wšakorakich městnach k namakanju. Něnto pak dajo digitalnu platformu „sobu“ wót Serbskego šulskego towaristwa z.t. (SŠT), kótaryž zgromaźijo a zwězujo serbskorěcne materialije a pedagogiske póstarki a je pó strukturěrowanej wašni za pedagogisku praksu spśistupnijo. W oktobrje jo webbok www.sobu.info online šeł, dnja 8. oktobra jo se wón w swětosnem ramiku zjawnje pśedstajił.
Ideju za ten projekt jo Andreas Ošika (1978–2023), něgajšny jadnaŕ wót SŠT, na drogu pśinjasł. „Wón jo cesto pśebywał w Dolnej Łužycy a jo pśemyslił, kak móžo se pósrědnjenje dolnoserbskeje rěcy pólěpšyś. Wón jo se wjelgin angažěrował za Dolnu Łužycu, to słuša k jogo zasłužbam“, jo Mila Zachariasowa, praksowa póraźowaŕka za serbske kupki w Dolnej Łužycy w nadawku SŠT, pśi prezentaciji „sobu“ w klubowni Dolnoserbskego internata na njogo dopomnjeła. Wóna jo to do rukowu wzeła, ideju Ošiki do statka stajiś a wšykno koordiněrowaś.