Z Mósta/Heinersbrück. Lětosa to źe bóžko njejsu take dobre kulkowe žni. Ale to njejo Mósćanarjow wót togo wótźaržało, jich woblubowany kulkowy swěźeń swěśiś, kenž mjaztym južo dłujku tradiciju ma. Za toś tu góźbu jo jich pśišło sobotu, 10. oktobra, dosć gromadu – dosć tych mósćańskich kulkow z prodrustwa. A teke zwjaselece wjele luźi jo pśišło gromadu, kenž jo se jich šmekowaś dało – ako kulkowe mlince a ako kulkowu pólewanku. Mósćańske žeńske su ga pilnje pjakli a warili za ten swěźeń. Cłonki senioroweje kupki su pśedawali fryšnje wupjacone kulkowe mlince a kafej, cłonki mósćańskeje Domowinskeje kupki su póbitowali wšakorake sam wupjacone tykańce a tu kulkowu pólewanku. A cłonki sportowego towaristwa su se starali wó piśa. Jich jo toś było wjele rukow, ako jo pilnje pomagało a ten swěźeń akle zmóžniło.

Južo zeger 10:00 su murske zachopili, stoły a blida pśi a w gmejnskem domje stajiś. Wótpołdnja su zuki Grodkojskeje dujaŕskeje gildy gósći pówitali – te pódpěraju južo wjele lět mósćański kulkowy swěźeń –, pótom jo šołta Horst Nattke swójo póstrowne nagrono źaržał.