Pśed dwěma lětoma, ga w septembrje 2024, jo zachopiła Cathleen Bürgeltowa (lětnik 1976) ako referentka za nastupnosći Serbow w kraju Bramborska. Ze zwěsćenim, „kak malsnje ten cas zachada!“, jo wóna se dała do rozgrona z Nowym Casnikom. Cas malsnje zachada, „a pśecej hyšći pśidu temy, z kótarymiž njejsom tak licyła a źož som se mysliła, pó wótběgu jadnogo lěta by ja to wšykno znała. Pśeto pón som raz była w kuždem gremiumje, som z kuždeju źěłoweju kupku a kuždym temowym pólom raz něco cyniś měła. Ale tak wjelerake ak serbske žywjenje jo tek mójo źěło“. A to jo tak derje za nju. „Dajo pśecej zasej nowe wěcy a to, se wě, jo wjelgin za-pśimujuce a zadora tomu, až padnjoš do rutiny.“ Wóna jo hyšći wěcej k tomu wukładła. Ale daś my ju nejpjerwjej bližej pśedstajamy. Sama jo sebje, ako jo 2024 we swójej funkciji zachopiła, luźam se cesto tak pśed-stajiła, až jo naslědnica Měta Nowaka. „Pón su luźe mógli mě zarědowaś.“ Bejny respekt ma wóna pśed tym, což jo Měto Nowak w swójom casu ako referent zagronitego za nastupnosći Serbow w Bramborskej, we tych źaseś lětach, pógibował. Wóna wšak njejo cele na samskem městnje ako wón tegdy.