Z Jeny/Jena. Dogromady ze sedym pśednoskami jo był Serbski institut (SI) wót 30. septembera do 3. oktobera na 15. Nimskem dnju slawistiki na Schillerowej uniwersiśe w Jenje zastupjony. K prědnemu razu jo wón se wobźělił ze swójim sociolinguistiskim panelom k dolnoserbskej rěcy. Źeń slawistiki jo nejwětšy slawistiski kongres w Nimskej a nejwažnjejšy forum wědomnostnego diskursa wót rěcow, literaturow a kulturow słowjańskich ludow.

Ten sociolinguistiski panel, ako jo SI organizěrował, jo měł titel „Niedersorbisch im Aufbruch: Chancen und Perspektiven für die Zukunft“. Te referenty Julija Běrinkowa, Evan Bleakly, Šyman Blum, dr. Anastasija Kostiučenko-Kessler a Měto Nowak su se pśiwobrośili aktualnym pšašanjam, což nastupa situaciju dolnoserbskeje rěcy, rewitalizěrowanje a rěcne planowanje. Wóni su informěrowali wó slěźaŕskich projektach instituta a mjazy drugim powědali wót witalnosći teje rěcy, wót rěcnych nastajenjow, wót widobnosći togo serbskego w zjawnem rumje a wót rewitalizaciskego projekta SROKA.