Z Města/Cottbus. Pśed žednymi lětami jo UNESCO wobzamknuła, až płaśe serbske nałogi a tradicije w Górnej a Dolnej Łužycy ako wjelgin gódne imaterielne swětowe kulturne derbstwo za ceły swět. Pópšawem by dejała dolnoserbska rěc, ako jo w tšachośe, dostaś teke taki wusoki status. Měto Nowak ze Serbskego instituta, ako se wjelgin cesto zaběra ze situaciju drugich narodnych a ludowych kupkow w europskich statach, jo na pósejźenju župnego pśedsedaŕstwa na to pokazał, až we wšakich europskich krajach rěcy mjeńšynow su šćitane wót UNESCO ako kulturne derbstwo. Ako dobry pśikład za to jo pomjenił rěc słowjeńskeje mjeńšyny w Korutańskej w Awstriskej. Tam južo z lěta 2010 ma toś ta rěc taki status wót UNESCO. To płaśi wósebnje za słowjeńske mjenja za jsy, za dwóry, póla a za tšugi.