Ze Slěpego/Schleife. Wałtoru, 29. septembra, jo se wótměło w Serbskem kulturnem centrumje (SKC) Slěpe prědne zjawne pśedstajenje stwórtego pśeźěłanego nakłada knigłow „Verschwundene Dörfer“ wudanych w Ludowem nakładnistwje Domowina (LND). Prědny nakład jo wujšeł 1995 a jo wordował k žywjeńskej twóŕbje awtora, prof. dr. Franka Förstera († 2011). Až do lěta 1990 jo było take zestajenje tabu-tema, togodla jo prědny nakład malsnje był rozpśedany a Frank Förster jo dał južo 1997 drugemu nakładoju slědowaś. We knigłach wopisane su byli wšykne kompletne a źělne wótryśa łužyskich jsow až do lěta 1993, kótarež su musali za wudobywanje brunice copaś.

Dokumentacije Franka Förstera k zgubjonym jsam su byli popularne dla cytanja gódnego wašnja pisanja. Luźe su mógali se z tym identificěrowaś, wšykne su žywe byli w DDR a su měnili: Tak jo to było, tak jo było našo žywjenje. Jasnje wuźěłany jo pśecej był zwisk mjazy zgubjenim domownje a derjeměśe (Wohlstand) pśinjasecym brunicowym górnistwom.