Z Bórkow/Burg. Ku góźbje dnja europskich rěcow 26. septembra jo bórkojska iniciatiwa „Burg verbindet/Bórkowy zwězuju“ pśepšosyła na koncert Paula Geigerzählera do Brunoweje billardoweje kjarcmy (Bruno’s Billard Kneipe). Jadnab 35 woglědarjow jo organizator wjacora Benjamin Dossow wuwitał a jo pśi tom teke cile a aktiwity iniciatiwy pśedstajił: Kupka se zasajźijo za žywe, wótwórjone a pisane wejsne žywjenje, za wěste rumy za zmakanja a wuměnu a organizěrujo filmowe wjacory w Bórkojskej cerkwi, queerne kafejpiśa abo su lětosa prezentěrowali mjazyreligiozny „tiny house“, kótaryž jo žydojska wuměłcowka wugótowała. Pótom jo fidlaŕ Paul Geigerzähler z Barlinja wšake spiwy ze swójogo wjelikego repertoire pśednosował. Źělnje ze serbskimi ludowymi spiwami ako „Gołbjašk dwě běłej nožce ma“, młogimi klasikarjami kupki Barlinska dróha ako „Zrudny Končak“ a wósebnje ze nimskorěcnymi punk-titelami jo publikum zagórił. Za pśechwatanku jo se pótom starała bubonowa kupka z Chóśebuza pód nawjedowanim Monica Ooro.