Pětk, 25. septembra, jo FDA Bramborska w bórkojskej bibliotece „Mina Witkojc“ cytanje wugótowało, pśi kótaremž su wšake teksty z antologije „Wurzeln & Wandel der Lausitz“ pśedstajili. Tak jo Źilka (napšawo) cytała pěś swójich basnjow, w serbskem originalu a nimskem pśełožku. Pśedsedaŕka FDA Bramborska, Hannelore Schmidt-Hoffmann (nalěwo) jo teke na 90. narodny źeń serbskego awtora Jurij Koch dopomnjeła a jo cytała z teksta „Schmerzen der endenden Art“ z jogo pjera, kenž jo tek w antologiji FDA wótśišćany. Wót Andrea Melcheroweje, ak chórosći dla njejo mógła pśiś, jo H. Schmidt-Hoffmann cytała pśinosk „Sorbisch? Wendisch? Poppyred.“. Wolfgang Hoffmann jo mjazy drugim cytał krotšu wersiju swójogo pśinoska wó „serbskem Lutherje“, ga fararju Jan Bjedrich Fryco z Gołkojc. Něźi 20 wjelgin zajmowanych luźi jo to cytanje dožywiło. 
Z Města/Cottbus. Pětk, 18. septembra 2026, su se zmakali cłonki Lichotnego nimskego zwězka awtorow (FDA), Krajny zwězk Bramborska z.t., w Měsćańskem muzeju w Chóśebuzu k swójej zgromaźinje. W srjejźišću su stojali aktualne pśedewześa ako teke planowanje za pśiduce lěto.
Cłonki su dostali pśeglěd wó temach a projektach za lěto 2027. Mimo južo etablěrowanych cytanjow w Chóśebuzu co krajny zwězk pśichodnje mócnjej nawězaś na aktualne temy. Planowane su mjazy drugim zarědowanja wó kumštnej inteligency, nowych technologijach a jich wustatkowanjach na cłowjeske žywjenje. Pód titelom „Spleśone, ale weto sami“ ma se na pśikład wobswětliś pšašanje za cłowjeskeju bliskosću w pśiběrajucem digitalnem swěśe.
Cytanja njedejali se pśi tom jano w Chóśebuzu wótměwaś. Teke druge města w Bramborskej su w rozgronje. Pomjenili su mjazy drugim Frankobrod (nad Odru), Gubin, Pódstupim a Barliń. Za Frankobrod (nad Odru) a Gubin pśedlažytej južo konkretne naraźenja za móžne městna zarědowanjow.