Z Gołkojc/Kolkwitz. 28 lět jo faraŕ Klaus Natho w Gołkojcach zwěrnu słužbu cynił, pozawnowy chor nawjedował a wjele cerkwinych swěźenjow a zarědowanjow w cełem regionje wugótował, na pśikład teke někotare raze Błośański cerkwiny źeń. A rada se dopomnjejom na wugótowanje Serbskego ewangelskego cerkwinego dnja pśed tśimi lětami w Gołkojcach. Tam som se bližej zeznała z fararjom Natho a markowała, kak efektiwnje a konstruktiwnje wón źěła. Njeźelu, 27. septembra, na rozžognowańskej namšy z nim, źož jo było wjelgin wjele luźi z cełeje wokoliny, jo superintendent Georg Thimme zespominał jogo žywjenje. Faraŕ Natho jo se naroźił w nimskich stronach, w Seelow blisko pólskeje granice, Serby njejsu jomu tam zawěsće wósebnje znate byli. Prědnu słužbu jo wugbał we Derbnje (Döbern), pón w Lěšćach (Hornow b. Spremberg), dalej su jogo drogi wjadli pěś lět do Afriki a na kóńcu do Gołkojc. Mě se zda pśez wócuśenje narodnego wědobnja gołbinskich žeńskich jo teke zachopił wěriś do žywego serbstwa.