Katja Hoffmannowa ako zastupna šołtowka jo starkich z kafejom pósłužowała na Tylcyc dwórje.Ceła wjas jo była rědnje wufajnowana, wupyšnjona. Pśed wšakimi dwórami su kwitli pisane struski. Teke te luštne figury su se wšym spódobali.Z wušej 90 lětami jo Marjana Worakowa nejstarša pjakaŕka mazańcow w Dešnje. Jo reportaŕce serbskego radija wulicowała do mikrofona, kaki rědny swěźeń to jo.Steffen Noack jo wupjakł mazańce w Bałcaric pjacu. Młodej źowći stej jomu byłej na pomoc.

Z Děsna/Dissen. Domowinska kupka w Dešnje jo jadna z nejlěp-šych we wjelikej Domowinskej župje Dolna Łužyca. Wóna organizěrujo za swójich něntejšnych cłonkow a za cełu wjas pśecej zajmne a rědne serbske žywjenje we jsy. To su wobydlarje a woglědarje mógali dožywiś slědnu sobotu. Pśi nejlěpšem wjedrje su wugótowali docełego prědny raz swěźeń z pjacami (Backofenfest), a pśi tom su Domowinaŕki a Domowinarje wjeliku pomoc dostali – wót gmejny, wót młoźiny, wót wognjoweje wobory a teke wót cerkwinskeje wósady.