Z Hochoze/Drachhausen. Pětk wjacor su měli delegaty na 34. Głownej a wólbnej zgromaźinje Domowiny župa Dolna Łužyca w hochoskem „Złośanem plonje“ dłujki wjacor. Mimo rozpšawowu župnego pśedsedaŕstwa a rewizijneje komisije a swětocnego pśiwześa styri nowych cłonkojskich towaristwow stej hyšći dwa dypka na dnjownem pórěźe stojałej: Wólby župana a pśedstajenje a wuměna wó dwěma koncepcijoma za serbske zmakanišćo respektiwnje serbski kulturny centrum. Pó małem kulturnem programje źiśeceje rejowaŕskeje kupki z Hochoze a póstrownych słowach hochoskego šołty Ronny Henke jo zastupny župan a jadnaŕ Domowiny Marcus Końcaŕ głownu zgromaźinu wótwórił. Mjaztym jo župa Dolna Łužyca narosła na nagromadu 3.416 cłonkow (w lěśe 2025: 2.830) w 31 Domowinskich a 12 młoźinskich kupkach a 29 towaristwach. K nowym cłonkojskim kupkam słušatej drjejcańska młoźina kaž teke Alumni Dolnoserbskego gymnaziuma. Zastupniki nowych cłonkojskich towaristwow stej amtěrujucy župan Michael Apel a Marcus Końcaŕ ned na městnje swětocnje pśiwitałej.