Z Drjenowa/Drehnow. Zachadny kóńc tyźenja jo teke drjenojska młoźina swójogo žnjownego krala pytała. Dogromady zaseś rejtarjow jo wó titel krala wójowało a 12 źowćow wó titel kralowki.

Až do togo su musali te młodostne hyšći wjele pśigótowaś. W dnjach pśed łapanim kokota su pilnje wěnce a wrota wuwili a wupyšnili. Sobotu su se wše wobźělniki a wobźělnice zmakali a z Picańskimi muzikantami wumaršěrowali. Prězy, ako pśecej, te tśo carne muže z kokotom. To jo wósebnosć w Drjenowje. Kužde lěto su tśo gólcy z młoźiny pódla, kótarež su ceło carne woblacone, kurje dymawku a se staraju wó to, až na wrotach wise kokot a małe dariki za rejtarjow. Tak jo to było teke lětosa.

Ako běchu te tśo carne kjarle kokota na wrotach powjesali, su druge gólcy se wó to procowali, głowu kokota wótryś. Pśi tom su musali kradu chwataś. Casy jo było wjedro kradu kipate a wětšowate a teke dešć jo se šeł. Tak su pó dwěma góźinoma južo wše tśo krale znate byli. Głowu wótrył jo Paul Dietrich. Drugi kral jo wordował Mika Piepka a slědne kśidło jo Claas Hannusch wótrył.