Do lětosnego septemberskego wudaśa Rozhlada Was zawjeźo komentar Vojtěcha Koubi, ekonoma z Pragi, kenž z nami źěli swóje mysli „Wo narodnosći mjodu abo spaźe europskeje ideje“. Jomu jo pśijaśel z Drježdźan darił głažk mjoda, na kótaregož etikeśe stoj „Deutscher Honig aus der Lausitz“. To jo wšake pšašanja we njom wuwołało...

Z Marekom Slodičku, kenž jo wót 2016 w rěcywědnem wótźělenju Serbskego insituta w Chóśebuzu zagronity za datowe modele, jo redaktorka Rozhlada Juliana Kaulfürstowa zajmny interview wjadła. Zgónijośo jogo drogu k dolnoserbskej rěcy, kak jo wordował „serbski gerc“ a kak jo to pśišło k załoženju spiwaŕskeje grupy „Rakajce“, ak južo tśi lěta eksistěrujo. Marek Slodička jo samo sam programěrował app za pśewóźowanje spiwanjow, kótaraž jo zrownju stawnje rosćeca zběrka spiwow we wšych serbskich wariantach a dalšnych słowjańskich spiwow. Wósebne na tom interviewje jo tek, až pšašanja Kaulfürstoweje cytaśo w slěpjańskej serbskej rěcy, a Slodička wótegronijo dolnoserbski.