Serbska stipendiatka rozpšawijo wó rěcnem kursu češćiny, na kótaremž jo se směła wobźěliś.

Ze Českich Budějovic/Budweis. W prědnych tśich tyźenjach awgusta jo se wótměła južo ta 34. lěśojska šula za słowjańske rěcy na filologiskej fakulśe w Českich Budějovicach. Tam mógu wšakorake luźe češćinu w intensiwnych kursach wót A1 do C1 nawuknuś. Wokoło 50 luźi jo tam było, kenž jo pśišło ze cełego swěta, ako z Ameriki, Taiwana, Japańskeje, Mongolskeje a hyšći z wjele drugich krajow. Se wě njejo pśi tom komunikacija pśecej ceło lažka. Głownje jo była engelska rěc słyšaś, a słowjańske luźe su mjazy nimi w swójich rěcach powědali, tak až jo wjelika mjazysłowjańska komunikacija nastała. W kursach rěcneju niwowu A1 a A2 jo rěc wucby engelska była, we wušych kursach pón se wě česka.