Z Bórkow/Burg. Pśi myslenju na Bórkowy a Błota pśiźoš na cołnowanja, górku, tu termu, lěbgodnu jězu, rědnu krajinu a Bismarkowy torm. Pšawidłownje něnto něco bloboco pódla togo torma. How ma młody Bórkowaŕ Benjamin Dossow swójo statkowanišćo. Wót někotarych lět ten 27-lětny intensiwnje wugbajo swój hobby – jo se ga pśepisał warjenju piwa. Jogo starjejšej wjeźotej gósćeńc „Zur Wildbahn“, źož wón jo w młodych lětach cesto sobu pomagał. Pó wuchójźenju Dolnoserbskego gymnaziuma jo to jogo śěgnuło wen do swěta. Na wěsty cas jo bydlił w Mexiko a jo tam póznał zajmne słoźeńske warianty (Geschmacksrichtungen) wót piwow. „Som se wrośił do Nimskeje z myslu, až to ga njamóžo tak śěžko byś, sam swójo piwo wariś“, wón se dopomnjejo. How w Nimskej jo wón do wjele wšakich piwaŕnjow woglědał a seminary a rozwucowanja we warjenju piwa absolwěrował. Pśed dwěma lětoma jo zachopił, swójske piwo „Spreebräu“ wariś. Co za tym mjenim štycy, to se skóro wót samego rozkłaźo. „Sprjewja jo južo pśecej źěl mójogo žywjenja. Som wótrosł how w Bórkowach, źěłam něnto w Barlinju pódla Sprjewje“, wón wulicujo.