Ako hobbyjowa gitaristka a basistka cesto wužywam internetowe portale, kótarež pósrědniju akordy a teksty znatych spiwow. Pśeto młogi raz coš spontanje ze pśijaśelami jaden znaty hit pśi wognišću zespiwaś a to z pór akordami na gitarje pśewóźowaś. Ale njamaš pśecej akordy a tekst kuždego spiwa w głowje abo spiwnik w kapsy. W toś tom paźe móžoš na wšakich online-portalach za muzikarjow malsnje za wěstym titelom pytaś, aby wótpowědne noty namakał. Žywe su take portale pśez pódpěru swójeje community. Pilne muzikarje wen słuchaju a pón notěruju noty a je wózjawiju we wšakich formatach. Tam skóro wšo namakajoš, za cymž twója muzikaliska wutšoba se póžeda: wót jadnorego pśeglěda akordow, pśez tabulatury – ako zwobraznjuju muster cybotanja na gitarje abo basu z pomocu licbow za luźi, kenž njewuměju muzikowe noty cytaś – až do cełych aranžementow za kuždy instrument twójeje band.