Z Dešna/Dissen. Wałtoru, 1. septembra, su se zasej wótwórili źurja rěcnego gnězda Zorja w Děsnje. Mjaztym južo stwórty lětnik z wósym wobźělnicami a wobźělnikami jo startował. Nowe Zorjaki póchadaju zwětšego z našogo regiona, z Města, Mósta, ale teke z Barlinja. Znate woblica ze serbskich institucijow su rowno tak pódla ako nowacki, kótarež prědny raz stupiju na serbske jawišćo. Nejžpjerwjej pak směju nowe „ptašacki“ w měrje se zažywiś. Pózdźej buźomy jich ako zwucony w Nowem Casniku pśedstajaś.

Zasej pódla su rěcne trenarje Franciska Albertowa, Pětš Śěžyński, Anka Zachariasowa a Gregor Wieczorek. Ale w rěcnem gnězdźe jo wótněnta teke nowe woblico wiźeś. Dešanaŕka Šarlota Kušcyc jo něnt źěl teama. Wót 1. awgusta jo wóna nowa projektowa wjednica Zorjow a buźo teke ako rěcna trenaŕka nowych Zorjakow wuwucowaś.