Teke na slědnem kóńcu tyźenja w awgusće su na jsach pytali za žnjownymi kralami a kralowkami.

Sobotu jo se wótměło łapanje kokota w Mósće/Heinersbrück ze šesć rejtarjami a 14 źowćami w drastwje. Dobył jo Lorenz Pawlik (Paulick), jogo kralowka jo Charlyn Rašojc (Rasch) wordowała. Mało kilomejtari dalej jo se wuběźowało sedym rejtarjow a 19 źowćow w Turnowje/Turnow wó titel krala a kralowki. Dobyłej stej Marius Mucha a Vanessa Wagnerojc.

Njeźelu jo wordował w Žylowje/Sielow ten stary kral teke zasej nowy kral. Alexander Blödorn jo był nejžlěpšy wót sedym rejtarjow. Z 12 źowćow jo sebje wu-zwólił Mareike Storzojc ako kralowku. W Bórkowach/Burg jo pokazała młoźina ku góźbje Domowniskego a drastwinego swěźenja nałog łapanja kokota. Dobył jo ze źaseś rejtarjow – mjazy nimi tśo z wjerbańskeje młoźiny – Joshua Winkler. Jogo kralowka jo Laura Weickertojc ze źaseś źowćow wordowała.

Sobotu, 5. septembra, łapju kokota w Popojcach/Papitz, Drjenowje/Drehnow a w Depsku/Döbbrick buźo wjeliki kokot. W Smogorjowje/Schmogrow se wótmějo k 625. wejsnemu jubilejoju zabijanje kokota.