Ze Strobic/Ströbitz. W chóśebuskem měsćańskem źělu Strobice su sobotu tradicionelny žnjowny swěźeń swěśili. Wósym rejtarjow a 21 źowćow a młodych žeńskich jo wjasele śěgnuło k zukam dujaŕskeje kapały „Strobicańske gerce“ pó jsy. Cil jo zasej był Šultkojc sćernišćo na Kwětkowej droze – how jo južo forta pśigótowana była, kótaruž jo młoźina z dubowym listom wobwiła.

Wó kronu žnjownego krala su lětosa wójowali: Max Běla/Behla (wótere raze jo juž wordował žnjowny kral, něga jo był šef młoźiny), Max Gommolla, Karl Schellenberg (amtěrujucy kral), Richard Schellenberg, Ben Becker, Viktor Biesold, Hannes Wagner a Marvin Fischer. Zwucowali za łapanje kokota su te zmužne rejtarje tek lětosa zasej na Jerolojc rejtaŕni w Rězakach (Mühlendorf).