Witajśo! Mě se groni Lena a som pódwjacorna slawistka (Westslawistin) ze pśichylenim k małym rěcam. Teke gaž som w Barlinju žywa, słuša mója wutšoba Łužycy a dolnoserbskej rěcy.

Dolnoserbska rěc musy widobnjejša byś, teke w socialnych medijach! Rowno togodla som pśed pśisamem dwěma lětoma Instagram-account niedersorbisch.lernen zachopiła, aby widobnosć regiona pówušyła a luźi z cełego swěta za dolnoserbsku rěc zagóriła.

Zagóritosć za dolnoserbsku rěc jo se w studiumje wuwijała, ale bóžko njejsom mógała na rěcne kurse chójźiś. Pandemija jo mě rěcne online-kurse pśi Šuli za dolnoserbsku rěc a kulturu „zmóžniła“, na te som „chójźiła“ – a som ceło rozbuźona wót teje rěcy była. Mjaztym mam wjele serbskich pśijaśelow a pśijaśelkow, kótarež móju zagóritosć źěle.

Což mě ako linguistka pśecej zasej felujo, jo widobnosć serbskosći zwenka Łužyce. Barliń jo swětoju wótwórjony, to jo wěrno, ale něco serbskego pśisamem docełego njedajo. Lěcrownož jo wjele Serbow w měsće žywych! Zda se, až Serby su pśisamem eksoty.