To jo było maksimalne zapókšyśe, ako jo how było k dožywjenju. Někotare narske su zalězli pó 131 stupnikach na rozglědanišćo Grodkojskego torma, ako lažy we wusokosći 28 mejtarjow togo dogromady 31 mejtari wusokego torma. How su měli wósebnje dobry wuglěd na to zjawjenje pśirody. Zmóžniło jo to towaristwo „Cottbuser Turm e.V.“, kótarež jo ten „kušy torm“, ako jomu serbski teke gronje, zwenka regularnych wótwórjeńskich casow na dwě góźinje spśistupniło.

To teke hyšći: te nejmalsnjejše gwězdźiny

Samo hyšći jaden drugi njebjaski fenomen jo hobby-astronomow a dalšnych zajmcow slědnu srjodu rozbuźił. Mjaztym až zajśmiśe słyńca jo se wótměło na pódwjacorje, wjelgin dłymoko pśi horiconśe, su pór góźinow pózdźej z dłujkozajtšnego směra gwězdźiny pó njebju byzali – te perseidy (Perseiden). Swójo mě wóni maju wót gwězdna (Sternbild) Perseus, pśeto se zda, ako by wóne meteory wóttam swójo wuchadnišćo měli.