Z Lubnjowa/Lübbenau. Wobstawnje jo była znata lubnjojska designerka Sarah Gwiszczojc pśi ludowych swěźenjach a drugich eventach prezentna, jeje modowe pśeglědki su byli wjerašk wóterych zarědowanjow a su pśecej wjele woglědari pśiwabili. Pón jo była pśestawka. Teke jeje loda w starem měsće Lubnjowa „jo w slědnem casu jano na słabem płomjenju źěłała“, tak wóna wulicujo slědkglědajucy. Zawina za ten měrnjejšy cas jo była cele pśirodna: naroźenje jeje syna! Ten jo trjebał połne pśichylenje swójeje mamy. Mjaztym až pśistajonym pomaga statna zepěra w takej wupominajucej familijowej situaciji, jo to pla pśedewześarjow ze śěžkosćami zwězane. „Som wšak wěźeła, do cogo se dajom“, groni Sarah Gwiszczojc. Do swójogo wobchoda, rownocasnje modowe studijo, wóna něnto pó starjejšynem casu zasej pšawidłownje woglědajo. Stawne kupowarje su jej zwěrne wóstali, wobchod ga njejo w mjazycasu zacynjony był. „Za to som Heike Killinej (Killa) njeskóńcnje źěkowna. Wóna jo pśišła kuždy źeń z Noweje Niwy do lody. Bźez jeje pódpěry by ja z wětšym tšuśim ze starjejšynego casa se wrośiła.“