Z Bórkow/Burg. Jadnorje z cołnom pó tšugach w Bórkowach se sunuś a na rědnem lěśojskem wjacorje ze pśijaznymi luźimi se we wótnapnětej atmosferje rozgranjaś! Tak jo był młoźinski aktiw dnja 31. julija – jo se ga pśepołožył na cołn. 24 młodostnych z Janšojc, Bórkow, Dešna, Barbuka, Gołbina, Strobic, Škódowa, Zaspow a Rogozna z tamnych Domowinskich młoźinow jo se wuměniło wó kokotach, ako lětosa hyšći se wótměju. Wótjěli su wót Rhenusojc cołnaŕnje, a tak to cynje južo wót wjele lět.

Pśi howacnych młoźinskich aktiwach informěrujo młoźinski koordinator Domowiny za župu Dolna Łužyca wó organizatoriskich wěcach, wó powšyknem wótběgu lěta abo stoj za pšašanja k dispoziciji. Pśi cołnowanju maju młoźinske šefy móžnosć, se do intensiwneje wuměny daś.

Až su tuchylu pśedewšym žnjowne swěźenje tema, se rozmějo. Jsy Bórkowy a Barbuk stej pśed cołnowanim južo kokota łapałej a móžotej cas až k Superkokotoju dnja 26. septembra póžywaś. Druge młoźiny štyce hyšći w pśigótowanjach a muse hyšći wjele wobmysliś. Mamy hyšći dosć wobwijańskego drota? Ga źomy nakupowat? Su pokale a pśepase južo skazane?